Skip Navigation Links
Destpêk
Nivîsar
Ziman
Peyvistan
Helbest
Çîrok
Mamik
Leyistok
Çandî
Kurdîgeh
Pêwendî
Arşîv
Skip Navigation Links
Murat Bayram
 
[hevpeyvîn] Omer Faruk Baran: Çawa ko bi tajiyê xelkê nêçir nabe bi zimanê xelkê jî ilim û emel nabe
2011-10-11 09:46
Murat Bayram
miradgundiki@gmail.com
Kovara pênGAVê kovarokeka xwendekarên zanîngehan ya çandî, zanistî û wêjeyî ye.

Edîtorê Kurdîgehê Miradê Gundikî, bi Omer Faruk Baranî re - li ser navê nivîskar û amadekarên Pêngavê ( "koma Pêngavê" )- hevpeyvînek çêkir.

Miradî pirsên ko di derheqê kovara Pêngavê de tê mereqkirin ji "koma pêngavê pirsî" û Omer Faruk Baranî li ser navê wê komê bersivên Kurdîgehê dan.

***

Kurdîgeh: Kekê Omer Faruk gelo tenê bi çend gotinan, tu çawa dikarî Pêngavê bidî nasîn?

O.F.Baran: Pêngav kovaroka xwendekarên zanîngehan a zanistî, wêjeyî û hûnerî ye. Wek gelek kovaran kurdî ev jî li Stenbolê hatiye dinê û jiyana xwe li vir didomîne. Ji aliyê hin xwendekarên bi sloganên wek ‘’zimanê me hebûna me ye’’, ‘’zimanê me rûmeta ye, ‘’jiyan bi kurdî xweş e’’ mezinbûnî derdikeve. Wek ku çawa bi tajiyê xelkê nêçir nabe bi zimanê xelkê jî ilim û emel nabe, ji ber vê yekê zimanê wê bi tenê kurdî ye. Pêngav gavan bi lingên xwe diavêje, serbixwe ye, him hemd û sipas him jî mixabin tu eleqaya wê bi ti sazî û nazî û rêxistin û pêxistinan re tine. Ev ji ajîtasyon û tajîtasyonan jî qet hez nake lê sponsorên wê xwendekarên zikbirçî û berîkqul in, lewma bi awayekî fotokopîk derdikeve. Hêjmara rûpelên wê ne standart e, carinan 24, carinan 32, carinan 62, carinan 68 rûpel e. Yanê Xwedê û xwendekaran çi daye çi nivîsiye ew e. Pêngav li dû xwe dinêre û dibîne heta niha pênc gavên mezin avêtine, niha xwe ji bo gava xwe ya şeşemîn amade dike û di vê mehê de wê derkeve pêşberî xwendekaran.

Kurdîgeh: We ji ber çi pêwîst dît ko hûn kovareka xwendekarên zanîngehê çêbikin?

O.F.Baran: Dema meriv dîroka çapemaniya kurdî dixwîne bi sedan kovar û rojname meriv dibîne. Lê yên zanîstî hêjmara tiliyên destekî derbas nake û yên zanistî û ji aliye xwendekaran ve derketî jî bi qasî tiliyên ku em ji bo azadiyê radikin hene yan tine ne. Me li derekê nedîtiye, hin neketiye destê me lê li gorî çavkaniyên Malmisanij 70 sal berê li Silêmanîyê ji aliyê dibistana ‘’Cem’îyetî Zanis-tî Kurdan’’ kovarek bi navê Zanistî derketiye, lê mixabin kovarek emirqut bûye. Wekî din piraniya kovar û rojnameyan li gorî şert û mercên dema xwe -birastî ev şert û merc qet naguherin!- bi tirkî û kurdî li ser wêje û hûner û siyasetê derketine. Mesela Apê Musa Anter dema ku li zanîngeha Stenbolê hiqûq dixwendiye bi navê xwe ya mustear Şeyhmus Elmas bi çend hevalên xwe re rojnameya heftane Dicle Kaynağı derxistiye. Em jî nivîsên li ser wêje û hûner û siyasetê diweşînin lê berê em cîh û heq didin nivîsên zanîstî. Bi du sê nivîsên li ser fîzyoterapî û hiqûq û matematîkê kovarek hema nabe kovareka zanistî lê mastê me ev e, mala me ava, em gava xwe diavêjin!

Kurdîgeh: We çawa dest bi xebatê kir?

O.F.Baran: Di serî de di koma Pêngavê de tenê pênc kes hebûn: Kenanê Nado, Umît Esen, Cumali Güler, Gernas û İsmetullah Özdağ. Kovar tenê ji bo xwendekarên zanîngeha Stenbolê derdiket. Lê paşê piştgirî û alîkarî ji xwendekarên zanîngehên din jî hat. Herkesî tala xwe re got ‘’barê me jî li ser vî kerî heye’’ û bi pexşanekê, bi nirxandinekê, bi rexneyekê, bi helbestekê, bi çîrokekê, bi ‘’ku-ji-destê-min-çi-hat’’ekê tevlî refên Pêngavê bûn. Ji Îzmirê, Edenê, Trabzonê, Kutahyayê û ji gelek bajarên Kurdistanê gelek xwendekarên Kurd bi rêya internetê têkîlî bi me re danîn û Pêngav gêhişt zanîngehên din jî.

Kurdîgeh: Çi zehmetiyên karê kovar çêkirinê hene?

O.F.Baran: Em xwendekar in, tenê di aboriyê de pirsgirêkên me çêdibin. Wekî din tu zehmetiyên xwe tine ne. Ustad Seîdê Kurdî dibêje ‘’rehet di zehmetiyê de ye’’. Em jî li dû şopa wê rehetiyê ketine, zor û zehmetî ne li ber çavê me ye.


Kurdîgeh: Xwendevan bi giştî ji bo kovara we çi dibêjin?

O.F.Baran: Di serî de me digot qey xwendevanên me tenê xwendekar in. Lê na, piştî mailên me ji nivîskar û rewşenbîran girt me fehm kir ku em xîtabî kesên ku wextekê xwendekar bûne jî dikin. Bi giştî tiştên erênî ji me re dibêjin, tew bêguman em pê kêfxweş dibin. Hin kêmasiyên me yên ku em nizanin hene, em van ji rexneyên xwendevanan hîn dibin û bi wê jî em kêfxweş in.
Kurdîgeh: Gelo li gor te kovar û nivîskarên ciwan dikarin çi tehsîrê li edebiyat û zimanê kurdî bike?

O.F.Baran: Armanca Pêngavê ne pêşdaçûyina zimên e, ev li pêş paşdaçûyina zimên a di nav xwendekarên zanîngehan de bendavek e. Bendaveke ku xerca wê ji peyvên Kurdî çêbûye. Aniha li zanîngehan ku xwendekarên bi zimanê xwe re mijûl bîst kes in yên ne mijûl sed û bîst kes in. Em dixwazin bigihêjin wan sed û bist kesan, ji ber vê yekê buhaya Pêngavê erzan e, 2 lîra ye. Tesîra me belkî li ser edebiyatê tune be, lê em bawer dikin ku wê tesîra me li ser ciwanan hebe. Îro li zanîngehên herî baş di beşên herî baş de bi hezaran xwendekarên kurd hene. Ku her yek ji cîhê xwe bi hevokekê piştgirîyê bide zimanê xwe belkî em mafê xwe yê perwerdahiyê jî bistînin. Ji xwe meş, mîting, çalaki, slogan û kovarên li ser zimanê kurdî jî divê karê ciwanan be. Pêşiyan belasebeb negotiye ‘’cot bi gayê pîr nabe’’.

Kurdîgeh: Çi gazindên we ji çapemenî, xwendevan, sponsor an ji civata kurdan re hene?

O.F.Baran: Tu gazincên me ji tu kesî tune ye. Herkes ji halê xwe razî ye, em ji herkesî razî ne. Ên ji me ne razî jî bila bi rêya internetê gazî me bikin, saziya Pêngavê qet nake naziya!

Kurdîgeh: Gotina dawî?

O.F.Baran: Ji bo Kurdîgehê em spas dikin û bi çargavî silav û rêzên Pêngavî xwendevanan re dişinin.

Nivîskarên Pêngavê: Kenanê Nado, Nazê Bawerî, Nûhat Deştî, Şadê Agon, Bawer Ronahî, Bahadîn Cilbigiravî, Mem Jan, Fuad Gulmuş, Şevger Cîlo, Orhan Hebhinark, Mistefa Dewlemend, D.Mislim Baran İsmetullah Özdağ, Janda Serfiraz, Gernas, Nûrullah Daderis, Kenan Kedkar, Sipan Dilkoçer, Peyrew Ronî, Evdilselam Ozdemîr, Axîn Ronayî, Mazlûm Berxwedan Aksoy, Mehmet Ali Konar, Nêçirvan Wan, Bêrû, Mehmet Sait Çakar, Marîn Rehman, Ceylan Erdem, Ayhan Reşkanî, , Îmad Bernas, Dilawer Dijraber, Eliyê Xanê, Şivan Ar, Rêbaz Şoreş, , Ezîzxan Altûntaş, Umit Eser, Omer Faruk Baran

Hevpeyvîn: Miradê Gundikî

_______________________





Pêngav*




Gaveka zimanê zanistî …




Gaveka xwendekarên zanîngehan …




Gaveka nivîskarên ciwan …




Pêngavên nû yên zimanê kurdî …




PÊNGAV







Ka tu çend GAVan nêzîkî Pêngavan î?






PÊNGAVekê bikire …






û tu jî GAVekê biavêje








www.kurdigeh.com ...