Skip Navigation Links
Destpêk
Nivîsar
Ziman
Peyvistan
Helbest
Çîrok
Mamik
Leyistok
Çandî
Kurdîgeh
Pêwendî
Arşîv
Skip Navigation Links
 
Cemşîd Alî Badir-Xan kî ye?(1939 - 1999) --- جەمشید ئالی بادر-خان کییە
2014-08-11 09:36
Kurdîgeh - Kurdistan
info@kurdigeh.com
Mîr Dr. Cemşîd Bedirxan kurê Mîr Celadet Alî Bedirxan û Rewşen Bedirxanê ye. Ew di roja 09.11.1939 an de li Şamê ji dayik bûye. Û Her wiha lê mezin bûye.

Lê jî xwendina xwe ya seretayî qedandiye. Li Libnanê jî xwendina navendî xwendiye û dawî li Şamê di xwendingeha Emerîkî û Orlhodoxiê de xwendina xwe a lîse bi dawî aniye. Di sala 1958 an de li ser wasiyeta bavê xwe Mîr Celadet Alî Bedirxan ji bo xwendina bijîşkîyê çûye Elmanya Rojava.


Li Elmanya, di sala 1959 an de, dest bi xwendina bijîşkiyê kiriye û di sala 1968 an de bi pileyeke baş doktoraya xwe di bijîşkiyê wergrtiye. Her wiha di gelek nexweşxaneyên Elmanya de û nêzîkî du salan jî di nexweşxaneyên Parîsê de karê bijîşkiyê kiriye. Ji bo xizmetkirina gelê Kurdistanê û vekirina nexweşxaneyeke taybetî, di temmuza sala 1970 an de piştî beyana 11 adarê seredana başûrê Kurdistanê kiriye, da ku li bajarê Hewlêrê nexweşxaneyeke taybet veke. Lê mixabin ji ber astengiyên sîstema hikûmeta wê demê projeyê wî pêre neçûye serî û careke din zîviriye Elmanya. Dema ku şoreşa Barzaniyê nemir destpêkiriye, wî jî rola xwe liztiye û bi dermanan û pêdiviyên tendirustiyê alîkariyên ber bi çav ji tevgera Kurdistanê kiriye..


Her wiha Dr. Cemşîd Bedirxan kar di damezrandina Komeleya Xwendekarên Kurd a (Li Şamê) kiriye û wiha jî di komeleya Xwendekarên Kurd a li Elmanya.. Hem jî di rêxistina Partiya Demokrata Kurdistanê ya şaxê Ewrupa de kar kiriye.. Vê paşiyê ji ber rewşeke taybetî dev ji kar û çalakiyên siyasî berdaye û êdî giringî daye karê xwe yê tenduristiyê.
Di salên 1985 û 86 an de Dr. Cemşîd Bedirxan bi nasnameyeke din û bi navekî din yê veşartî, seredana cîh û warê, bav û kalên xwe bajarê Cizira Botanê dike. Nêzîkî du mehan li bajarê Şirnex, herêma Botan û gelek bajarên bakûrê Kurdistanê digere.

Her wiha ji bo derfeteke xebatê lêkolîn û hevdîtinan pêk tîne. Lê mixabin li wir jî ji ber bindestiya welat û astengiyên dewleta Tirk nikare li wir zêdetir bimîne û dîsa bi neçarî vedigere Elmanya.


Dr. Cemşîd Bedirxan di roja 19.09.1975 an de li gel Michtield xanim dizewice û du zarokên wî yên bi navê Kurd (Curd) û Evîn çêdibin. Curd û Evîn herdu li Elmanya dijîn. Dr. Curd xwendina xwe ya bijîşkiyê qedandiye û niha di nexweşxaneyên Elmanya kar dike. Evîn jî li Elmanya xwendina Pedagojî qedandiye û li wir kar dike. Her wiha ew li gel Jiyan Bedirxan tevlî jiyana hevjîniyê bûye. Dr. Cemşîd Bedirxan di roja 10.12.1999 an de li Brezilya yê koça dawî dike û termê wî li bajarê Koblenz yê (Elmanya) dispêrin axê. Dr. Cemşîd Bedirxan ji derveyî zimanê Kurdî, zimanên Erebî, Ingilîzî, Fransî, Elmanî, Tirkî û Portogalî bi awayeke baş dizanîn.


Yezdanê mezin wî bi dilovaniya xwe şa bike û cihê wî buhişta rengîn be.
------
Konê Reş(facebook.com/kone resh )

Qamişlo 03/08/2014
-----------------------------

میر در. جەمشید بەدرخان کورێ میر جەلادەت ئالی بەدرخان و رەوشەن بەدرخانە. ئەو د رۆژا ٠٩.١١.١٩٣٩ ئان دە ل شامێ ژ دایک بوویە. و ھەر وھا لێ مەزن بوویە.

لێ ژی خوەندنا خوەیا سەرەتایی قەداندیە. ل لبنانێ ژی خوەندنا ناڤەندی خوەندیە و داوی ل شامێ د خوەندنگەھا ئەمەریکی و ئۆرلھۆدۆخێ دە خوەندنا خوەا لیسە ب داوی ئانیە. د سالا ١٩٥٨ ئان دە ل سەر واسیەتا باڤێ خوە میر جەلادەت ئالی بەدرخان ژ بۆ خوەندنا بژیشکییێ چوویە ئەلمانیا رۆژاڤا.


ل ئەلمانیا، د سالا ١٩٥٩ ئان دە، دەست ب خوەندنا بژیشکیێ کریە و د سالا ١٩٦٨ ئان دە ب پلەیەکە باش دۆکتۆرایا خوە د بژیشکیێ وەرگرتیە. ھەر وھا د گەلەک نەخوەشخانەیێن ئەلمانیا دە و نێزیکی دو سالان ژی د نەخوەشخانەیێن پاریسێ دە کارێ بژیشکیێ کریە. ژ بۆ خزمەتکرنا گەلێ کوردستانێ و ڤەکرنا نەخوەشخانەیەکە تایبەتی، د تەمموزا سالا ١٩٧٠ ئان دە پشتی بەیانا ١١ ئادارێ سەرەدانا باشوورێ کوردستانێ کریە، دا کو ل باژارێ ھەولێرێ نەخوەشخانەیەکە تایبەت ڤەکە. لێ مخابن ژ بەر ئاستەنگیێن سیستەما ھکوومەتا وێ دەمێ پرۆژەیێ وی پێرە نەچوویە سەری و جارەکە دن زیڤریە ئەلمانیا. دەما کو شۆرەشا بارزانیێ نەمر دەستپێکریە، وی ژی رۆلا خوە لزتیە و ب دەرمانان و پێدڤیێن تەندروستیێ ئالیکاریێن بەر ب چاڤ ژ تەڤگەرا کوردستانێ کریە..


ھەر وھا در. جەمشید بەدرخان کار د دامەزراندنا کۆمەلەیا خوەندەکارێن کوردا (ل شامێ) کریە و وھا ژی د کۆمەلەیا خوەندەکارێن کوردا ل ئەلمانیا.. ھەم ژی د رێخستنا پارتیا دەمۆکراتا کوردستانێیا شاخێ ئەوروپا دە کار کریە.. ڤێ پاشیێ ژ بەر رەوشەکە تایبەتی دەڤ ژ کار و چالاکیێن سیاسی بەردایە و ئێدی گرنگی دایە کارێ خوەیێ تەندورستیێ.
د سالێن ١٩٨٥ و ٨٦ ئان دە در. جەمشید بەدرخان ب ناسنامەیەکە دن و ب ناڤەکی دنیێ ڤەشارتی، سەرەدانا جیھ و وارێ، باڤ و کالێن خوە باژارێ جزرا بۆتانێ دکە. نێزیکی دو مەھان ل باژارێ شرنەخ، ھەرێما بۆتان و گەلەک باژارێن باکوورێ کوردستانێ دگەرە.

ھەر وھا ژ بۆ دەرفەتەکە خەباتێ لێکۆلین و ھەڤدیتنان پێک تینە. لێ مخابن ل ور ژی ژ بەر بندەستیا وەلات و ئاستەنگیێن دەولەتا ترک نکارە ل ور زێدەتر بمینە و دیسا ب نەچاری ڤەدگەرە ئەلمانیا.


در. جەمشید بەدرخان د رۆژا ١٩.٠٩.١٩٧٥ ئان دە ل گەل مچتەلد خانم دزەوجە و دو زارۆکێن وییێن ب ناڤێ کورد (جورد) و ئەڤین چێدبن. جورد و ئەڤین ھەردو ل ئەلمانیا دژین. در. جورد خوەندنا خوەیا بژیشکیێ قەداندیە و نھا د نەخوەشخانەیێن ئەلمانیا کار دکە. ئەڤین ژی ل ئەلمانیا خوەندنا پەداگۆژی قەداندیە و ل ور کار دکە. ھەر وھا ئەو ل گەل ژیان بەدرخان تەڤلی ژیانا ھەڤژینیێ بوویە. در. جەمشید بەدرخان د رۆژا ١٠.١٢.١٩٩٩ ئان دە ل برەزلیایێ کۆچا داوی دکە و تەرمێ وی ل باژارێ کۆبلەنزیێ (ئەلمانیا) دسپێرن ئاخێ. در. جەمشید بەدرخان ژ دەرڤەیی زمانێ کوردی، زمانێن ئەرەبی، ئنگلیزی، فرانسی، ئەلمانی، ترکی و پۆرتۆگالی ب ئاوایەکە باش دزانین.


یەزدانێ مەزن وی ب دلۆڤانیا خوە شا بکە و جھێ وی بوھشتا رەنگین بە.
-----

قامشلۆ ٠٣/٠٨/٢٠١٤